قلب کو اس کی رویت کی ہے آرزو

 اللهُ اللهُ اللهُ اللهُ

قلب کو اس کی رویت کی ہے آرزو

جس کا جلوہ ہے عالم میں ہر چار سو

بلکہ خود نفس میں ہے وہ سُبْحٰنَهُ

عرش پر ہے مگر عرش کو جستجو 

              اللهُ اللهُ اللهُ اللهُ

عرش و فرش و زَمان و جہت اے خدا

جس طرف دیکھتا ہوں ہے جلوہ ترا

ذَرّے ذَرّے کی آنکھوں میں تو ہی ضیا

قطرے قطرے کی تو ہی تو ہے آبرو

اللهُ اللهُ اللهُ اللهُ

تو کسی جا نہیں اور ہر جا ہے تو

تو منزہ مکاں سے مبرہ ز سو

علم و قدرت سے ہر جاہے تو کو بکو

تیرے جلوے ہیں ہر ہر جگہ اے عفو

اللهُ اللهُ اللهُ اللهُ

ہر نہالِ چمن ذِکر سے ہے نہال

ذِکر حق ہی اسے کرتا ہے مَالا مَال

ذِکر سے چوک کر ہوتا ہے وہ نڈھال

ذِکر ہی تیرا ہے اس کی وَجہِ نمو

اللهُ اللهُ اللهُ اللهُ

وہ بھی تسبیح سے رکھتا ہے اِشتغال

جو نہیں رکھتا منہ اور لسانِ مَقال

پھر بھی گویائے تسبیح ہے اس کا حال

اس کی حالی زباں کہتی ہے تو ہی تو

اللهُ اللهُ اللهُ اللهُ

جو ہے غافل ترے ذِکرسے ذُوالجلال

اس کی غفلت ہے اس پر وَبال و نکال

قعرِ غفلت سے ہم کو خدایا نکالق

ہم ہوں ذاکر ترے اور مَذکور تو

اللهُ اللهُ اللهُ اللهُ

ہے زبانِ جہاں حمدِ باری میں لال

دَم کوئی حمد کا مارے کس کی مجال

تا بَا ِمکان ہم رکھتے ہیں قِیْل و قَال

اس کو مقبول فرمالے رحمت سے تو

اللهُ اللهُ اللهُ اللهُ

بھردے اُلفت کی مے سے ہمارا سبو

دِل میں آنکھوں میں تو اور لب پر ہو تو

کیف میں وَجد کرتے پھریں کو بکو

وِرد گایا کریں پے بہ پے سو بسو

اللهُ اللهُ اللهُ اللهُ

 رحم فرما خدایا حرم پاک ہو

تو نے تقدیس بخشی ہے جس خاک کو

دَفع فرما وہاں پر ہے بے باک جو

اور گرا بجلیاں قہر کی بر عدو

اللهُ اللهُ اللهُ اللهُ

نور کی تیرے ہے اِک جھلک خوبرو             

دیکھے نوری تو کیوں کر نہ یاد آئے تو

ان کا سروَر ہے مَظہَر ترا ہوبہو

مَنْ رَّاٰنِیْ رَاَ الْحَقّ ہے حق مو بمو

اللهُ اللهُ اللهُ اللهُ  

خوابِ نوریؔ میں آئیں جو نورِ خدا

بقعۂ نور ہو اپنا ظُلمَت کدا

جگمگا اُٹھے دِل چہرہ ہو پُرضیا

نوریوں کی طرح شغل ہو ذِکرِ ھو

اللهُ اللهُ اللهُ اللهُ

طالب دعا محمد انعام خان قادری